MINISTRA MSS VISITA CNR BECORA

Dep. Media 13 November, 2017 

Ministra Solidariedade Sosiál, Dra. Florentina da Conceição Pereira Martins Smith, akompaña hosi Diretór Jerál Servisus Corporativos, Rui Manuel Gago Exposto, kontinua hala’o vizita traballu ba Centro Nacional Reabilitação (CNR), ne’ebé hala’o servisu iha área defisientes. Vizita ne’ebé hala’o iha Loron Segunda-Feira, (13/11/2017) ne’e, ho nia intensaun atu haree besik liu programa no atividades ne’ebé durante ne’e CNR implementa.

Ministra MSS, Dra Florentina Smith hatete katak, CNR sai hanesan Instituto ida nebe halao ninia ezekusaun atividades no orsamental ho resultadu nebe diak tebes iha tinan 2006 no hetan apresiasaun husi Governu anterior i presija atu akompaña no observa nafatin iha futuru. Alende ne’e, Ministra mòs husu ba funsionàrius sira atu labele dezanima i lakon esperansa liu-liu ba ita nia maluk defisientes sira nebe mak presija CNR nia apoiu. Nudar Ministra, nebe tutela direta ba Instituto refere sei apoiu i fó forsa nafatin ho màsima no fó nafatin atensaun ba Instituto refere, nunee bele hala’o sira nia atividade tuir Plano asaun no Orsamentu nebe sira planeia ona.

Nune’e mós Diretóra Jeral CNR, Dra. Verónica das Dores iha ninia apresentasaun hateten, Centro Nasiona Reabilitasaun estabelese bazeia ba Decretu Lei nú. 37/2012, 1 de Agosto nudar Institutu Públiku ida integradu, dotadu autónomia administrativa, finanseira no patrimónial Proprio hodi halao ninia Visaun no misaun nebe ligadu ho àreas prioridades mak hanesan Desenvolvimentu Institusionàl, sensibilizasaun no prestasaun servisu.  Em termos implementasaun programa CNR, Diretóra Jeral realsa katak, sei hasoru obstaklus sira hanesan falta rekursus umanus, materiais no ekipamentus no falta fatin asesibilidade ba ema ho Difisiensias.  Tamba ne'e husu ba VII Governu Konstitusional hodi tau matan no fo prioridades ba asuntu refere.

Vizita ida ne’e, hetan mós akompañamentu hosi Diretór Jerál Korporativu-MSS, Rui Manuel Gago Exposto,  nomós Xefe Departamentu balun, Asesores nasionais e internasionais no funsionarius Gabinete Ministra MSS.